「最後答案？」呢句耳熟能詳嘅問題，相信大家都知道係嚟自陳啟泰喺《百萬富翁》嘅經典對白。當年鄧光榮同陳芷菁超自信嘅「拍定手先」演出，至今依然令人津津樂道。正所謂長江後浪推前浪，最近一位「其」女子就憑住「技驚四座」嘅演出一夜爆紅！

話說喺近期一集嘅土耳其版《百萬富翁》節目，26歲參賽者Su Ayhan去到第4條問題遇到少少困難，主持人問佢「Great Wall of China」喺嚟自邊個國家，分別有中國、印度、南韓同日本畀佢揀。連條問題都有埋答案，估唔到阿Su咁穩陣用錦囊，問完現場觀眾再打電話問朋友，最後後喺朋友幫助之下，阿Su終於揀咗「中國」呢個答案，可惜佢喺下一條問題衰咗出局。

呢集出街之後，阿Su即刻成為網絡紅人，畀網民笑佢明明條問題都有埋答案，點解可以咁都唔識答。受到群眾壓力之下，阿Su日前拍片解畫，話覺得條問題有埋「China」呢個字，冇理由咁筍嘅，覺得有蠱惑所以用錦囊喎，果然夠穩陣！