文：聶瞳

公司有個超現實女同事，假公濟私揀求職者嚟見，目的係為自己搵男朋友，結果食屎食著豆，唔單止姣媾高富帥嘅美夢落空，出嚟食飯仲要請埋客，真係偷雞唔到蝕包米。

是咁的，女同事登咗隻稿請人，見到一份CV個名叫Justin，本身都冇咩特別，但睇真啲對方原來喺美國返嚟，家住大圍名城，女同事對眼即刻發晒光，好似思春咁諗咗陣，終於決定約Justin上嚟interview，諗住啱食就公器私用。

Justin上到嚟已經其貌不揚，話就話美國讀大學，但啲英文講到「甩甩Cut Cut」，F.5都流利過佢，最正係咩呀？係姣婆遇著脂粉客，女同事想姣嗒有錢仔之餘，對方都係老江湖，Justin又何嘗唔係想食女。女同事開口埋口就話人哋住大圍名城點都有個譜，結果兩條友interview完之後都冇跟進份工，而係開始喺電話傾下計談談情。

後來女同事講返件事，大家都覺得Justin怪怪哋，又話想同佢去旅行，重返以前美國讀書嘅地方，講到要帶佢離家出走咁，一日又幾廿個Whatsapp，煩過我哋阿媽，不過女同事依然係嗰句:「人哋住大圍名城點都有個譜。」

條路自己揀，下一句我就唔講喇。

Justin冇錯係住大圍名城，但唔知係咪阿爸阿媽好慳？養成佢唔肯使錢嘅習慣，一係就屋企唔會畀錢佢揸手，總之女同事幾次同Justin出街都係食普通茶記，最豪嗰次係譚仔三餸加碟土匪雞翼，不過重點係AA制，譚仔嗰次最貴，成張單過百，咁啱Justin話未撳錢，仲要女同事埋單。

雖然女同事冇講，但我知佢諗乜，一定係好似啲台灣偶像劇咁，以為個有錢男友想試下女方係咪可以一齊捱窮，過到呢關就同佢共富貴，喂！醒下啦！你個樣都冇忽似台劇女主角。

食飯AA制都算喇，自己出返自己嗰份都好合理，最慘係之後佢哋結伴落bar飲嘢，Justin仲持醉行兇毛手毛腳，飲到high high哋拖實女同事隻手，又從後攬腰，真係陰公豬，煲咗咁耐冇食過對方一餐，仲要畀人抽水，大圍名城好巴閉咩！如果對方係正人君子又有心發展，大圍新翠邨都可以好開心，咪再用地址去衡量一個人啦，咁樣同嗰班租個九龍塘地址搏入名校嘅怪獸家長有咩分別呀？

專欄作者簡介：
辦公室日報 聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/