喺打機界享負盛名嘅職業機友 Douglas Martin，堪稱係「男人公敵」。點解呀？事關佢有合約在身，份工就係全職打機，係《Call Of Duty》呢隻 Hit Game 嘅高手。加上佢有個拍咗幾年拖、被譽為「最索天氣女郎」嘅墨西哥女友 Yanet Garcia，試問又點會唔惹人妒忌吖？

不過 Douglas 就認真大嘥，日前竟然透過互聯網宣布，佢已經同 Yanet 掟煲，原因係佢要專注自己嘅打機事業！現年 23 歲嘅 Douglas 話：「Yanet 又靚又叻，絕對係 100 分嘅女朋友，我知道有啲奇怪，但我要為自己嘅前途打算，我哋已經分咗手！」

據 Douglas 所講，佢而家已經係全職機友，有合約在身，加上佢希望成為《COD》呢隻 Game 嘅世界冠軍，所以每日都要花好多時間打機。況且佢住喺紐約，而 Yanet 就住喺墨西哥，根本好難去維持呢段「Long D」關係。

Yanet 本身係負責報天氣，亦已經簽咗畀經理人公司，嚟緊會接拍電影同擔任 Model 工作，希望 Douglas 呢個決定唔會後悔喇！