33歲，喺高強度嘅職業球壇嚟講絕對係一名老將，不過C朗就例外，一把年紀都依然咁Fit，絕對係有價有市。祖雲達斯用成億歐元收購C朗，究竟呢盤生意係賺定蝕？
嗱，C朗以1億歐元由皇馬過檔祖雲達斯，一加盟呢支意甲勁旅，短短24個鐘就賣咗超過52萬件波衫，幾乎搵返C朗嘅一半轉會費。要知道祖雲達斯上年成年先賣得85萬件波衫，家陣一個C朗，用咗一日就賣咗52萬件，足證佢人氣幾咁堅！
而隨住C朗加盟，一系列嘅C朗周邊商邊亦都賣到通街都係，就連那不勒斯嘅商人都食住個勢抽水，推出C朗廁紙。大大隻C朗印喺卷廁紙度，喂，點捨得用呀？女球迷就話用嚟抹嘴，可以當同C朗Kiss啫，咁男球迷又可以點用呢？
