文:聶瞳
男人,雖然大部份都係遲熟,不過都有例外,呢樣嘢要睇下經歷咗幾多?吃過幾多苦?包袱有幾重?衰咗之後有冇痛定思痛都係關鍵,唔係每個人都有從錯誤中汲取教訓嘅慧根,有啲跌過一次就記得有幾痛,亦有啲人可能要鬧足100次先會成才。
最近身邊有多過3個女性朋友都同另一半分手,原因都係同齡嘅男朋友唔夠成熟,忍過、妥協過、遷就過,始終都係行唔到落去,呢種感覺係好無奈,明明好鍾意,可惜唔Work。問題係女人要去等待一個未成熟嘅男人進化,係一場近乎輸唔起嘅賭博,好彩嘅3年、5年,如果係7年、8年、9年,甚至10年呢?耗盡青春都等唔到呢一日亦大有人在。
喺職場打滾咁耐,年紀輕輕可以從容不迫,運籌帷幄嘅人的確有,但係唔多,甚至少到我都好難記得起,富二代或者太子爺之流可能係淡定啲嘅,但佢哋只係贏在錢多,背後有back up,同成熟又係兩碼子嘅事。
我身邊其中一個真實個案,係一個老竇開食肆嘅富二代,終日無所事事炒股票,蝕足一年,不過佢依然淡定,關鍵只係老竇大把錢,蝕嚟蝕去都係面嗰浸,佢結婚照樣有層凱旋門做新居,一毫子都唔使供,亦唔使煩生活費,老婆有怨過佢游手好閒,咁又點啫?普通人窮一生去上車,佢老公垂手可得,要層樓要家底,定係要一個溝通到嘅老公,只能講句人各有志!
年紀大係咪就會有大將之風呢?都唔一定,唔使睇你公司啲old seafood,淨係講我以前個上司,50歲,老細個friend,月入7萬幾,日日返工玩candy crush,每日我做到隻狗咁嘅時候,電話就會傳嚟叮一聲,喂係呀,佢又喺facebook send咗個request嚟,叫我畀條命佢過關,佢條命真係生得好好,但每次公司有咩事,或者遇著啲麻煩客,都係靠我哋班細去解圍同補鑊。
好多時女人未必等到心愛嘅男人成熟,當佢見到呢一日嗰陣,可能彼此已經有另一半,甚至有家庭,或者真係呢次分手而導致個男仔痛定思痛,好可惜佢嘅成熟已經趕唔切用嚟回報你當日嘅愛,Timing有時就係錯得咁離譜,係咪好殘忍?