大家有冇留意,去親「9gag」睇人啲惡搞圖,梗會成日見到一位皮笑肉不笑,貌似楚原嘅阿叔。唔講唔知,原來佢大有來頭,不過成為全球互聯網潛力圖人物,都曾經令佢有啲唔開心......
呢位阿叔叫做 Arató András ,現年73歲,係一位匈牙利電機工程師。喺 2010 年嗰陣,佢同屋企人去土耳其旅行,當時佢影咗啲旅行相掟上互聯網,結果有個攝影師睇到之後主動聯絡佢,搵佢做 Model 影咗一系列 Stock Photo,主要係用嚟賣畀公司作 Design 用,即係大家見到佢喺度用電腦、飲咖啡同鬥木嗰啲相。
不過由於 Arató 嘅強顏歡笑樣太過搞鬼,所以一班後生仔開始改佢啲圖,加啲好抵死嘅對白同句子上去,久而久之,大家一見到佢個樣就忍唔住想笑。 Arató 曾經係匈牙利電燈公司嘅副主席,都有返咁上下地位,返到公司冇晒威嚴,佢梗係唔 Happy 啦!
不過咁, Arató 話能夠帶畀人歡樂,佢都好開心。仲話而家喺布達佩斯街頭搭車、行街都有人認到佢,試過揸揸吓車,竟然有後生仔衝出馬路話要同佢合照,真係成個荷里活明星咁款。至於個強顏歡笑樣, Arató 咁解畫:「我唔係 Model ,影輯相要影成幾個鐘,咁笑法係人都硬晒啦塊面。」