我有位女同事逢星期一至星期四都唔出街,放工要即刻返屋企,就算佢男朋友撲到黃子華嘅飛都無動於衷,喂大佬,子華神最後的棟篤笑喎,我嗰晚結婚擺酒都延期啦!偏偏呢位女同事不為所動,堅守五六日先出街嘅原則,原因係做嘢好攰喎。
 
雖然我會為子華神放低呢份堅持,但平時嘅我都係專揀五六日先出街,原因唔係攰,而係我唔鍾意著西裝,最諷刺當然係我一星期要著足4日啦,好在我公司逢星期五可以Smart Casual,著少一日得一日,試過好多次約朋友星期五放工去食飯,佢哋都會為我一身Casual打扮而驚訝,有時仲會問:「你係咪畀人炒咗呀?」
 
坦白講,我著到咁「茄」仲未畀人炒真係偷笑,事關公司指引係Friday可以Smart Casual,茄還茄,加個Smart就唔同玩法喇,因為Smart Casual喺西方嘅定義應該係上身有領,即係著番恤衫或者Polo,而下身就係我哋平時所講嘅扯布褲,不過我就非常犯規,直情著T恤牛仔褲。
 
可能你會話:「唓,西咩方啫,呢度係香港。」至弊我公司係鬼佬公司,外國上市呢,嗰班西人team head好跟呢一套,西人真係西方個西,唔係大家平時講開嗰隻「西」。
 
但係點解咁耐以嚟都冇人話過我呢?又點解我可以大模施樣唔跟正宗Smart Casual呢?因為我公司有個別男同事仲過份,真係夠膽死戴帽同埋著條穿窿老牛,短褲涼鞋我都見過,我記得有個鬼佬team head睇到眼都凸埋,差啲心臟病發咁滯。
 
反面教材唔好學,如果你去咗大公司或者一個鬼佬當道嘅Office,記得Smart Casual呢個有領上身同埋扯布褲下身嘅定義。
 
至於平時一至四著西裝,其實就冇乜禁忌嘅,男仔基本上有一條黑色、一條寶藍色同埋一條灰色西褲,咁已經足夠走天涯,呢三隻色夠晒大路兼百搭,上身襯咩色嘅恤衫都可以,就算件恤衫有格仔、間條或者其他pattern都carry到,反而要留意如果寶藍同灰呢兩個色,想襯晒西裝褸同西褲就建議搵同一間舖頭嘅套裝,因為呢兩個色比較多色差,例如灰都有好多隻,西裝褸同西褲如果喺唔同舖頭入手,襯埋一齊有明顯深淺之分都幾怪。
 
個人好鍾意襯埋西裝背心,唔係扮有型,只係可以遮肚腩,感覺上slim啲,但要留意如果著黑色西裝背心襯黑色西褲的話,Lunch就盡量唔好去酒樓飲茶喇,比人認錯係部長叫你落單就唔係咁好啦。
 
若然你高大威猛著西裝就點襯都好睇,傳說中有183cm嘅蕭叔叔同埋「游生」袁文傑都係著西裝J死人嘅佼佼者,呢個係男人睇男人嘅視點,我問過身邊啲女性朋友,竟然大比數話王浩信先係佢哋心目中嘅西裝男神,王浩信咁靚仔,唔著衫都型架啦!
 
專欄作者簡介:
辦公室日報 聶瞳
記者出身,後脫離傳媒行業,誤打誤撞加入獵頭公司,幫人搵工,間接令一個家庭得到溫飽,因而成為我的第二人生。
Facebook專頁:
https://www.facebook.com/officedaily/